政情：郭亮明宣布九月退休
一向作風低調屬「行動派」嘅懲教署署長郭亮明，前晚喺一個職員晚會上，突然宣布自己會喺今年九月退休，同同事提早say goodbye，並祝福大家，說時語氣平靜，一貫「鐵漢」風格。據知今年九月係佢五十七歲生日，屆退休年齡，故要退位讓賢，相信會由副署長單日堅接任，唔使好似以前咁，要由外人空降。
記者其實一早風聞佢會喺今年內退休，所以早前已問定佢退休大計，當時佢就話諗緊環遊世界，甚至重拾書本，其實佢將卅七年青春畀晒懲教署，都係時候享受吓！講開佢後生時係懲教署內出名的美男子，靚仔之餘仲好勇猛，好似佢膊頭嘅紅銀雞繩，係早年平息越南船民中心騷亂，防暴有功而得來，全個懲教署得幾個人有。
「坐定粒六」等做署長嘅單Sir據知都有一條紅銀雞繩，前年香港搞奧馬，佢借調幫手，據講佢籌備應變計劃表現出色而獲嘉獎，有懲教老友話單Sir來頭都好猛，做過赤柱監獄十二年保安主任，專諗計同啲重犯鬥智鬥力，有懲教飛虎之稱的緊急支援隊，都係由佢成立。