政情：霍震霆碌齡技驚四座

九龍灣展貿嘅保齡球館尋日好熱鬧，保良局喺度搞咗個慈善保齡球賽，好多明星名人大展身手。立法會議員霍震霆（Tim）以港協暨奧委會會長身份擔任主禮嘉賓，佢謙稱後生時曾經迷過保齡球，但係已經好耐冇再掂過囉！點知佢一開波就全中，簡直技驚四座。
霍震霆一開波就全中，果然係寶刀未老。
霍震霆一開波就全中，果然係寶刀未老。

Tim對體育嘅支持熱忱毋庸置疑，但係佢近年較忙，大家好少見識佢喺體育方面嘅真功夫。喺佢為保齡球比賽開波之前，主人家保良局總理黃英鵬仲問過Tim，使唔使換過對保齡球鞋，Tim仲話，打一個波啫，唔使咁麻煩啦！誰不知一出手就引起全場歡呼，大家都勁讚佢好身手！

至於有講法話香港可能「褪軚」唔舉辦亞運，因為無論點計，條數都要蝕，Tim就話個人希望香港可申辦二○一九年亞運會，佢仲話如果要推遲到申請二○二三年嘅亞運會，對運動員嚟講，實在係太長遠。

鄭泳舜全副裝備留囝囝

保良局副主席鄭錦鐘嘅公子、深水埗區議員鄭泳舜同太太拍拖前來，佢笑謂後生時都玩過保齡，鄭太踢爆話，佢屋企仲留有全副裝備，包括手套、波鞋同埋私家波添，鄭泳舜笑謂要留番畀個仔喎！