政情：高佩璇楊釗訪夢老傾佛偈
喺佛教界德高望重嘅夢參老和尚（夢老）近日訪港，尋日喺志蓮淨苑舉行一場佛學講座，吸引數百善信，潛心向佛嘅潮屬社團總會名譽會長高佩璇及「牛仔褲大王」楊釗都嚟「朝聖」。夢老遠道由五台山來港，高佩璇出錢出力接待，楊釗就視夢老開示如甘露，抄足筆記粒幾鐘仍未停手。
今年九十六歲嘅夢老同香港淵源深，自九二年起，每年例必抽空來港弘法，每次均是座無虛席。楊釗同夢老私交甚篤，尋日趁講座後私下拜訪老人家傾佛偈，楊釗講笑話：「你（夢老）睇嚟似七十歲噃。」氹到老和尚笑逐顏開。
獲贈香氣佛珠
高佩璇都係夢老粉絲，兩人相識七年，無所不談。夢老推崇佛教中的「利他精神」，果然講得出做得到。話說高佩璇日前見夢老身上掛住一串散發香氣嘅珍貴佛珠，隨口講句：「夢老，你個身好香！」話口未完，夢老靜雞雞將佛珠轉贈高的女兒，弟子睇見驚嘆大和尚如此捨得！