政情：接掌總商會肥胡買定保險

總商會高層位置輪替近年蒙上唔少政治化色彩，最經典係上年五月，總商會周年大會選舉新理事，「田少」田北俊想支持兩名候選人進身理事會，豈料事敗，更錯愕地連自由黨楊國琦也失落總商會副主席位置，據聞當時就係肥胡喺背後發功，同田少鬥法。既然情況有啲複雜，今次總商會出現「倒胡」暗湧，可以預見，據聞有人質疑肥胡嘅接班能力，而最有力指控，就係批評肥胡唔係商界老闆，代表性成疑。

艾爾敦做先例冇有怕

究竟係唔係真係有人「倒胡」，外界至今仍難以確認，但一向小心駛得萬年船嘅肥胡，已經做晒抗敵措施，一於水來土掩，兵來將擋。據悉，肥胡評估過，關於自己唔係老闆身份嘅質疑，對其未構成殺傷力。

肥胡事先準備好嘅理據係，首先，佢現時係日本最大銀行三菱銀行嘅大中華區首席顧問，又係中國農業銀行董事、安永會計師事務所高級顧問，喺商界聯繫極多極深。第二，前滙豐「大班」艾爾敦當年做總商會主席時，亦已離開滙豐，去一間大型會計師行做高級顧問，有先例可循，肥胡呢個常務副主席，要接任主席，應該難度唔大。

有商會消息指，總商會近年其實已由肥胡一脈掌控，睇上年總商會理事會選舉一役就略知一二，對田少支持嘅候選人得心應手全面封殺，就知肥胡喺總商會嘅實力，絕非普通一個常務副主席咁簡單，而係關係盤根錯節，風吹不倒，所以，肥胡做主席，應該十拿九穩。