中環耳目：田少最愛叉燒食得刁鑽
旅發局主席田北俊食盡天下美食，但係返璞歸真，佢最鍾意嘅食物竟然係叉燒，佢愛以叉燒送飯，就連叉燒包都唔放過。田少食叉燒，鍾意叫半肥瘦，但係會將肥肉揀番出嚟，只食嫩滑嘅瘦肉，認真刁鑽。
田少做主席嘅萬泰集團喺九龍灣起咗一座Manhattan Place，佢不時都會去巡視吓業務，「一號九龍」喺Manhattan Place隔籬，所以會去「鍾菜」開餐，最想食嘅都係叉燒包。為食靚包，田少四出試食，但兜兜轉轉，還是覺得山頂一間酒樓嘅叉燒包最正，每星期例必幫襯，佢笑言以前柯打一籠就夠，依家連孫仔都識得叉燒包好味，所以要叫夠兩籠至夠食。
喺田少眼中，點至算係絕世好包呢？「啲包一定要夠熱，仲要即蒸即食！」佢早前去北京開兩會，搭高鐵去天津，食過熱辣辣嘅狗不理包子，令佢留下好好嘅印象。
卓妮