中環出更：國產錶王韓國龍另有所好
內地人對於名牌手錶嘅購買力一向好強勁，不過內地有十三億人，追求世界名牌嘅人始終係少數，大多數人都愛用國貨，咁內地人氣手錶係邊隻牌子呢？答案喺中國海澱集團主席韓國龍嘅笑容就可以搵到啦！事關佢生產內地銷量分別位居冠、亞軍嘅羅西尼（Rossini）同埋依波（EBOHR）國產錶，不過韓國龍自己卻係百達翡麗（Patek Philippe）嘅粉絲。
卓妮喺早前海澱宣布進軍遊艇分銷市場嘅活動上，見到韓老闆一派悠閒，卓妮同佢傾內地手錶市場，佢更加笑到見牙唔見眼，因為旗下孖寶已佔國產錶市場達四成五，每年銷量達一百萬隻，仲同飛亞達、天王錶並稱為內地國產錶嘅「四大天王」添！
韓老闆非常睇好孖寶嘅發展，但係卓妮見佢唔捧自己場，戴住瑞士錶Patek Philippe喎！佢解釋話，Patek Philippe係佢嘅偶像，勁鍾意佢哋純手工打造，又冇太多花巧嘅設計。
韓老闆仲透露，正密謀收購瑞士錶廠，以便擁有一個地道嘅瑞士製造手錶品牌，滿足佢對瑞士錶嘅崇拜。
卓妮