中環出更：黃永光三喜臨門笑騎騎
尋日絕對係信和太子爺黃永光（Daryl）嘅吉日，上晝佢先喺港鐵慈善競步賽攞咗雙冠軍，即係港鐵主席邀請賽競步賽冠軍，同埋籌款最多公司獎第一名，令Daryl喜出望外。轉頭佢隻愛駒「永利多」又喺快活谷跑出，Daryl拉頭馬、開香檳，風頭超勁冇法擋。
尋日雖然係星期日，但係朝早十一點幾，好多平時喺中環返工嘅城中名人又喺中環遮打道現身，佢哋係嚟參加港鐵主席邀請賽組別嘅競步賽，真正跑手要完成十公里賽事，但係主席邀請賽只得一公里。卓妮見到好多名人嚟撐場，好似連續第三年參加嘅亞洲金融總裁陳智思（Bernard）、安老事務委員會主席「金刀梁」梁智鴻、醫管局主席胡定旭等。運輸及房屋局副局長邱誠武都有出席，但係全程同港鐵主席錢果豐保持「比翼雙飛」嘅速度，兩人有傾有講，邱副似出席畀面派對多過嚟做運動噃！
競步奪冠 愛駒又贏出
到咗衝線嘅緊要時刻，眼科醫生周伯展率先跑出，西醫工會會長楊超發醫生跑第二，Bernard跑第三，Daryl只跑第四。但係競步唔單止講究速度，更加講究姿勢正確，所以經大會評判扣埋姿勢分後，名次重新大執位，完全冇出錯嘅Daryl連跳三級奪冠，周醫生跌落一個名次至亞軍，Bernard就維持第三名。Daryl開心到飛起，佢話差唔多年年都嚟支持港鐵嘅活動。今次佢為個活動籌得十二萬五千元，攞咗籌款最多公司嘅金牌先，跟住又憑個人實力攞埋競步金牌，真係出錢出力不落人後。
轉頭Daryl又喺快活谷出現撐隻愛駒「永利多」場，結果「永利多」好生性，幫Daryl贏咗四十八萬頭馬獎金，Daryl開香檳慶祝拉頭馬，全日笑到嘴都合唔埋！
卓妮