政情：阿Ron飛宿霧唔投票
行政會議成員夏佳理（Ron）又同朋友開賭局。阿Ron上次做莊，同大家賭立法會有幾多人辭職，結果估中五人辭職嘅朋友唔止一人，阿Ron輸得好慘！
五區補選臨近，今次大家再開兩個盤，首先係估五個辭職嘅立法會議員能否喺補選後全體重返議會，阿Ron再次做莊，話如果買中五個議員都順利重返議會，賠率係一賠十，大家見咁吸引，當然踴躍落盤啦！另一個賭盤係估補選投票率，由逾一成至三成都有人估，阿Ron就估有兩成幾，呢個賭盤嘅玩法係無人做莊，即是邊個估得最接近就可以通殺。
至於阿Ron呢位行會成員會唔會喺補選中投票，佢話投票當日咁啱菲律賓嘅親家八十大壽，佢要飛去宿霧賀壽喎，所以唔會投票嘞，特登搭飛機去賀壽，真係有心！財爺５．16補選日將率團外訪，阿Ron又話嗰日要去宿霧賀親家，睇怕嗰日仲有好多名人要離港，費事麻煩，香港分分鐘擺空城計。