政情：李大壯認拖欠屋租
啱啱被政府委任做「香港——台灣商貿合作委員會」主席嘅全國政協委員李大壯，佢租住嘅中環花園道豪宅愛都大廈中層單位被人追租約四十萬元，仲鬧到上法庭，被業主要求收樓。李大壯尋日回覆查詢時承認，單位用公司名義租賃，係公司職員睇漏眼無交租，佢前晚由外地返港，即刻如數清還所有欠款。佢又話，做生意嘅，有時為咗資金周轉，拖租一、兩個月難免咁話。
辯稱公司疏忽
自言喺愛都住咗近十年嘅李大壯，以月租九萬五千元租住愛都中層一個單位連車位，不過佢由舊年十二月開始欠租，業主前日入稟高等法院，追討共四十萬元欠租。李大壯解釋，個單位係佢同家人自住，由於「公司內部出現疏忽」，自己又太忙，無時間跟進，所以先搞到欠租，佢話自己有責任。
我哋問佢怕唔怕被人覺得無錢交租，佢笑住話：「人哋點睇，點樣幻想，我控制唔到，亦毋須解釋。」李大壯話，開公司做生意，資金轉嚟轉去，拖數在所難免，只係今次公司以為只係欠咗一、兩個月租，後來至知係四個月，所以前日佢一返到香港，即刻簽支票清還所有欠租。