政情：立會答問騷煲呔曾焗讓路

眾所周知，財政司司長曾俊華呢份預算案劣評如潮，無論民主派定建制派，當日肯定鬧到停唔到口，加上修正案多達九項，一日點搞得掂？所以，立法會秘書處尋日通知議員，答問大會改期，順延一日喺星期五舉行，煲呔曾畀自己嘅「曾氏兄弟」鬍鬚曾阻頭阻勢，認真活該！

煲呔曾平均每三個月上立法會一次答問會，今次少有地黐住預算案表決日，點知就畀鬍鬚曾阻頭阻勢。議員尋日收到秘書處通知，原定下星期三舉行嘅答問會要改期，押後一日，理由係今年就預算案提出嘅修正案多達九項，以致難以估計喺星期四下午三點前能否表決到預算案。其實，修正案多、費時耗力，只係立法會預留兩日時間畀預算案嘅原因之一，最重要因素都係預算案太爛，議員鬧足一日都鬧唔完。

大家應該記得，舊年立法會表決預算案，撞啱幾個建制派議員本來有事要「告假」，好似黃容根做腳骹手術，黃國健要飛澳洲出席個仔嘅大學畢業禮，李鳳英腰傷未愈咁，再加上翌日至少有八人跟隨政務司司長唐英年北上，同廣東省省委書記汪洋見面，港府為咗爭取最多支持票，夾硬焗立法會開夜車，通宵辯論完表決，但即使夾埋嗰啲擬告假嘅建制派議員，最終亦要硬食二十二張反對票，比前財政司司長梁錦松○三年嘅廿一張反對票紀錄仲要差，亦害到全體議員捱夜，怨聲瀰漫整棟立法會大樓。

防泛民玩拉布

吸取舊年教訓，今年立法會仲敢鬆懈？鬍鬚曾今年份預算案完全無料到，被指無力遏抑社會最關注嘅樓價高企問題，又解決唔到最深層次矛盾之一嘅貧富懸殊問題，中產無受惠，基層繼續受苦，議員唔鬧爆至出奇！

民主派今年隨時又上演舊年嘅「拉布戰」，唔通又叫班建制派議員一齊開夜車咩？你估建制派真係奉旨要保你鬍鬚曾呀，立法會預留多一日辯論，當係同鬍鬚曾買定保險啦！不過，就阻住煲呔曾上答問大會，呢鋪算唔算「曾氏兄弟」自己人打自己人呢？