中環出更：仁愛堂換屆李太佗孖胎迎賓
仁愛堂董事局尋日換屆，多位新面孔曝光。理文造紙主席李運強新抱李何芷韻（Amanda）新加入做總理，中國網絡資本有限公司主席莊舜而（Shirley）「升呢」做主席。今屆仁愛堂董事局人氣盛，成員多達三十五人，破晒歷年紀錄。
就職禮上，臨盆在即嘅Amanda佗住龍鳳胎照樣列隊迎賓，認真有心。Amanda話，當初應承做總理時未有ＢＢ，點知話口未完就有喜，今日就職，點都要同未出世嘅龍鳳Ｂ分享喜悅。老公李文斌（Edmond）似乎比太太更緊張，擔心嬌妻企得耐腳腫，全程在旁
到實。
保良破例急撥款賑災
仁愛堂辦喜事，東華主席梁定宇、保良主席呂鈞堯及仁濟主席董吳玲玲都嚟撐場，仲有仁愛堂創辦人劉皇發添。
呂鈞堯夠勤力，拉埋保良副主席鄭錦鐘（Eric）緊急開會。傾乜呢？原來係為青海賑災。Eric話，青海地震災情刻不容緩，雖然保良開會一般要七日前發通知，今次都要破例，於是把握機會，趁一眾保良核心出席仁愛堂就職後馬上開會，拍板通過捐款三百萬元解青海災民燃眉之急，效率超高。
卓妮