中環出更：伍氏三寶歎咖啡撐Starbucks
咖啡連鎖店星巴克（Starbucks）喺香港落地生根十年，佢哋將當年喺中環交易廣場開設嘅首間分店換上新貌，尋日重新開幕。身為Starbucks香港合作夥伴揸fit人嘅美心集團主席兼董事總經理伍偉國（Michael），尋日與美國過嚟嘅Starbucks公司主席、總裁兼首席執行官Howard Schultz，同一眾高層齊齊主持剪綵儀式。咁熱鬧，當然唔少得美心集團創辦人、伍偉國叔公伍沾德上台分享喜悅啦！
伍沾德伍偉國錫老婆
平時甚少出席公開場合嘅伍太羅寶盈，罕有地現身撐老公，仲陪住伍偉國嫲嫲排排坐，認真係乖孫新抱。不過Michael呢個忙碌中環人都一樣係好老公，佢話閒時會親手煮浪漫咖啡氹老婆，仲會同老婆拍拖帶兩歲幾嘅大仔同未夠一歲嘅細仔去Starbucks，當然囝囝只係飲babycinno，唔係咖啡飲品，而係奶類飲品。
除咗賢內助之外，叔公、叔婆同嫲嫲都一樣早早嚟到撐乖孫，揸住拐杖、坐住輪椅出入嘅伍沾德，更上台主持開幕禮。儀式完咗之後，三位精靈長輩仲坐低歎杯咖啡食件餅。唔知能幹、幽默同錫老婆呢啲特質係咪有得遺傳，叔公都一樣有齊呢啲特質，佢話唔錫老婆就無早餐同靚餸食，大讚老婆出品全屬佳品，兼且係牌品好之人，真係句句甜入心！
講番Starbucks，嚟緊佢哋會推出即溶咖啡VIA，仲計劃喺港澳開多八間。至於美心集團，今年會喺深圳開第一間元氣壽司，其他業務亦會不停擴展。咁唔知Michael嘅枝葉有無同步擴充呢？佢笑笑口話，努力緊努力緊，但要問過老婆先得，果然係「愛妻號」！
卓妮