政情：鬍鬚曾訪俄避補選
公民黨同社民連派人辭職搞所謂「公投」，一出手就擺咗成班高官上枱，煲呔曾首先話去唔去投票要諗過度過，暫時賣個關子。依家佢嘅真兄弟財政司司長曾俊華都大搖大擺唔投票，佢下個月補選前以公務名義率團出訪俄羅斯，同團唔投票嘅仲有一大班財金高官。
鬍鬚曾下月中會帶埋一眾銀行同物流業界代表，出訪俄羅斯等國，諗住同班業界發掘當地有咩商機。雖然呢個觀摩團嘅詳細行程仲未定實，亦未知仲有幾多高官會同行，但肯定嘅係個訪問團會喺補選前起行，五月廿幾日先返嚟，只要跳咗上鬍鬚曾同行嘅飛機，就肯定可以同五月十六日嘅投票講拜拜。記得今年一月鬍鬚曾原本率領一眾財金官員訪京，但北京連日大風雪，搞到鬍鬚曾訪京未能成行，總之「人算不如天算」。希望俄羅斯唔會五月飛霜喇，否則又打錯算盤。
「五區公投」聯合委員會發言人余若薇就大鬧鬍鬚曾鬼祟，話佢根本係搵藉口唔去投票。