政情：肥亨賀表弟牛一
「獎門人」曾志偉前晚喺尖沙咀大搞生日會，佢嘅前高官表哥、中策集團主席馬時亨都有撐場，但肥亨因為啱啱去完美加返港好疲累，逗留咗個半鐘就離開，志偉親自送客，臨別前與肥亨來個擁抱。肥亨之前嘅美加之旅主要為傳教機構「恩雨之聲」演講籌款，籌得折合過百萬港元善款之餘，仲有好多人因為佢嘅「見證」而信主。
肥亨講開美加之旅，特別提起兩件驚險遭遇，原來佢出發當日，去到機場先醒起忘記帶護照，於是拜託太太王培琪（Linda）趕返屋企攞護照，好彩機場快線夠快，最終趕得切上機。肥亨上到機以為安樂晒啦，點知飛機駛到跑道時，機上突然有乘客發羊吊（癲癇症），航機即時要返回停機坪將病人接走，令航班延誤一小時先起飛，好彩肥亨仍趕及參加溫哥華首場晚宴演講。
近年Linda每逢五月都負責統籌喺大球場舉行嘅世界祈禱日活動，今年已經係最後一年，Linda獲邀到發源地南非參加祈禱日，香港呢邊就交由肥亨主持大局，肥亨隨太太主持祈禱日咁多年，相信難唔到佢嘅。