政情：問責高官齊縮骨

煲呔曾孫公同好此道

停車熄匙與港人日常生活息息相關，作為相關嘅政策局長，邱騰華好應該向市民詳細解釋政策大方向以至執行上嘅細節，最好嘅方法當然係召開記者會，等各大傳媒可以直接轉播，市民亦可以直接掌握政策內容。點知邱騰華尋日見記者時，只點題式話停車熄匙喺執行上會畀司機三分鐘時間作緩衝，至於如何計時、由誰執法等問題，完全冇解答到，搞到在場記者一頭霧水後，佢又話要閃人，最後要新聞官打圓場，叫記者有乜唔明就喺簡介會上問喎。今時今日仲係咁嘅態度，難怪特區政府民望咁低！

其實近年唔少高官公布政策時，都傾向以簡介會形式向傳媒解畫，一來唔使直接面對鏡頭，唔使考急才；二來官員喺會上發表任何言論，一律只以「政府消息」引述，即使講錯說話都冇人知，令市民想問責都無從問起。

其實，喺去年嘅慳電膽事件上，煲呔曾被指明益親家，身為有關問責高官，邱騰華都成為眾矢之的，唔知佢係咪見過鬼怕黑，所以都染上「縮骨」惡習，好似年初公布廢電器電子產品生產者責任計劃時，佢都係用呢招。

芸芸問責局長中，最常用呢招嘅怕且要數教育局局長孫明揚。孫公早前推出中學「五減一」自願縮班方案及推銷新教學語言政策時，都係公開對傳媒噏幾句後，再搞個簡介會補飛。不過要數「縮骨」佼佼者，非煲呔曾莫屬，好似前日港府公布政改方案咁大件事，煲呔曾竟然只係發表預早錄影嘅電視講話當交差，足證佢「縮骨」功力之高，無人能及！怪不得啲問責局長有樣學樣，連直接面對市民都唔敢，縮得就縮。