中環耳目：朱繼陶勁讚麥兆記雲吞麵
香港鐘錶業總會主席、太子珠寶執行董事朱繼陶（Joseph）對鐘錶珠寶有研究外，亦係食家一名，平時除咗喺高級食肆開餐之外，都會搜羅大街小巷特色美食。Joseph就向卓妮極力推介天后電氣道間「麥兆記（祖傳）廣州雲吞麵」，勁讚該店嘅祖傳鮮蝦雲吞麵值得一試。
Joseph推介嘅祖傳鮮蝦雲吞麵乃麥兆記鎮店之寶，秘訣係堅持用鴨蛋打麵，所以打到啲麵香口彈牙。至於雲吞入邊嘅鮮蝦肉同豬肉比例恰到好處，製作過程一絲不苟。Joseph話，以前住喺柏景台時已經常去麥兆記幫襯，都係鍾意該店啲麵仲係沿用番舊式嘅手打麵工夫，令啲麵食落好有韌度，好抵讚！
原來麥兆記嘅來頭唔小，係本港老牌麥奀記老闆麥奀嘅女兒同夫婿所創立，正宗麥系嫡傳，所以有番咁上下水準。麥奀喺上世紀六十年代起已在中區機利文舊街創立麥奀招牌，廣受歡迎至今。
卓妮