中環出更：邱德根嫁孫女官商雲集
尋晚氣溫驟降，細雨濛濛，不過灣仔君悅酒店就非常熱鬧，事關喺香港官商界都吃得開嘅遠東發展創辦人邱德根嫁孫女，好多官商名流畀面到賀，場面相當墟冚。人情暖意，令卓妮都無懼寒流。
邱家人脈廣，出席喜宴嘅嘉賓冠蓋雲集，城中一眾富豪亦都前來沾吓喜氣，人稱「四叔」嘅恒基地產主席李兆基同大仔李家傑一齊嚟，細仔李家誠同千億新抱徐子淇唔知係咪怕搶新人鏡，無由正門入場。
其他大孖沙仲有長實集團副主席李澤鉅、恒隆集團主席陳啟宗、嘉華國際主席呂志和、合和實業主席胡應湘太太郭秀萍、協成行主席方潤華同囝囝方文雄、「玩具大王」旭日國際主席蔡志明一家、東方海外主席董建成夫婦同埋利豐集團主席馮國經夫婦等。
至於政界人士亦好多都係一對對咁嚟，包括多名政府高層，好似教育局局長孫明揚夫婦，政制及內地事務局局長林瑞麟就單刀赴會，仲有基本法委員會副主任梁愛詩、中聯辦副主任黎桂康等人，睇到卓妮眼花繚亂！
官商之外，立法會議員都有唔少，好似梁劉柔芬孖老公同劉皇發，霍震霆同細佬霍震寰就兩兄弟都有去。
大家姐唔介意妹妹爬頭
筵開五十席嘅喜宴以Garden作主題，布置清新浪漫又不失華麗，仲有旋轉木馬做點綴。以美國設計師Vera Wang婚紗作嫁衣嘅新娘子邱詠賢（Wendy）明艷照人，拖實100分老公、恒安國際集團嘅太子爺許清池出場，佢哋兩個舊年註咗冊，但為咗搞一個盡善盡美嘅婚禮同賓客分享喜悅，所以等到今年先至擺酒。Wendy大讚老公樣樣好，所以拍咗一年拖就肯答應做許太。
邱家三條Q出名感情好，所以即使畀妹妹爬頭，大家姐邱詠筠（Winnie）都唔介意，仲為妹妹擔任伴娘送嫁，認真溫馨。至於新外父邱達昌就直言第一次嫁女好唔捨得，不過佢力讚勤力嘅女婿好錫囡囡，又肯負責任，所以佢好放心交個女畀佢，仲話想快啲升呢做公公添。
卓妮