政情：徐立之做唔成建築師

港大、恒生銀行同青協尋日合辦「青年領袖教室」，請嚟徐校長同四百位學生真情對話。徐立之自嘲缺點多，讀書時記性麻麻，考試成績一般，反而最叻畫圖，得意之作係用月餅紙盒砌模型。

中學畢業後，徐校長入唔到心儀嘅港大讀建築系，考入中大生物系。塞翁失馬焉知非福，畀佢發現原來繪畫長處喺生物系亦大派用場，徐校長沾沾自喜話，一個蝴蝶生命史，其他同學用上千字解釋，佢畫一個圖已說明一切。自此愈讀愈起勁，讀埋博士學位，仲做咗頂尖科學家，專門研究遺傳學。

徐校長兜咁大個圈講故事，無非想話畀大家知，「天生我材必有用」，每個人都各有長短，最緊要將勤補拙，盡展所長，自然無往而不利。