政情：政府打亂普選聯陣腳

政府尋日公布修訂後嘅冇改政改方案，將各方殺個措手不及，一直有同政府溝通嘅終極普選聯盟都話事前冇收到料，普選聯召集人馮偉華（圖）話，估唔到佢作為召集人嘅卡片都仲未印好，政府嘅方案已經出街，其實普選聯嘅網頁，都係啱啱整好擺上網。唔知道卡片同網頁會唔會因為方案嘅面世而成為明日黃花呢？

馮偉華最近接手普選聯召集人同教協會長兩個崗位，其實係現任教協會長張文光全力抬佢上轎。對於做教協會長，當然要得到教協元老司徒華嘅支持。馮偉華話，佢同華叔嘅接觸唔多，但從其他教協嘅核心了解到，華叔身為教協監事會主席，喺教協開會經常不留情面咁批判其他理事，不過總唔會鬧馮偉華，華叔對「華仔」嘅印象，或者由此可知一二。

華叔之前講過教協被滲透嘅問題，馮偉華今次上位，一定係夠晒「信得過」。其實馮偉華參與社運廿幾年，八十年代爭取八八直選，馮偉華都有份，難怪畀張文睇中做接班人。