政情：撐拐杖上立會CY獲優待

政改方案尋日出爐，高官拉大隊到立法會列席撐場，副局長同政助都唔敢怠慢，好似教育局副局長陳維安、民政事務局副局長許曉暉、勞工及福利局政助莫宜端等都有去旁聽。行政會議方面，除咗夏佳理（Ron）及梁智鴻外，去年滑雪扭傷腳嘅召集人梁振英（CY），啱啱補做完手術趷趷吓都去撐政改，仲特別得到優待添。

CY去年同家人到北海道滑雪時不慎扭傷左腳膝蓋十字韌帶，其實佢之前農曆新年已經行動自如，但行路向右轉時就有啲唔自然，原來腳傷未完全康復。CY最近就決定去做手術徹底根治腳患，由於手術後康復要一段時間，所以暫時要用拐杖行路，尋日仲獲立法會安排坐喺官員後排一個傷殘人士位置，好似成為高官一分子。

泛民議員表明反對呢個冇改方案，意味着政制發展好大機會原地踏步，連政制及內地事務局局長林瑞麟隻手都作出「自然反射」配合，話說尋日佢出席政改記者會期間，好順手將疊厚厚嘅政改諮詢文件放晒喺地下，好似垃圾咁散到滿地都係，你話幾唔畀面！