政情：《南早》道歉冇誠意！

篇幅僅兩吋乘兩吋

《南早》實牙實齒話尋日會喺頭版刊登道歉啟事，當然要碌大對眼睇該報幾有誠意啦，左睇右睇，唔見嘅？望落啲，都仲未見喎。再望落下半版繼續搜索，終於見到個好似郵票咁細嘅啟事，嗰則所謂嘅啟事，篇幅只得兩吋乘兩吋，真係細得可憐，幾乎要用放大鏡至睇得清楚，大意寫上：「《南華早報》為昨日喺報道中錯誤翻譯國家主席胡錦濤嘅中文姓名，表示深切歉意。」

原來呢啲就係《南早》所謂嘅頭版刊登道歉啟事，相比前日喺頭版刊登嗰張十吋乘五吋幾嘅胡錦濤出席峰會圖片故事，簡直就係蚊髀同牛髀，譯錯國家主席姓名咁大件事，最低限度都要交代番件事嘅來龍去脈啦，依家用一句話交代就草草了事，簡直就係玩弄緊我哋嘅國家領導人，大家見識到《南早》嘅道歉有幾大誠意、處事有幾嚴肅啦！

話時話，英文報紙寫開英文，又點解忽然間學中文報紙咁寫中文呢？十足鬼子佬扮孔夫子，學人寫扑扑齋，正一阿茂整餅，無嗰樣整嗰樣，難為《南早》仲辯稱處理呢單新聞由記者到編輯以至校對，所有經手人都唔係華語人士，連中文都唔識多隻；既然係咁，就咪學人寫中文啦，依家畫蛇添足變咗捉蟲！

《南早》今次鬧出報界天大笑話，更成為國際傳媒爭相報道嘅醜聞，咁啱正在北京服刑嘅維權人士胡佳申請保外就醫被拒，《南早》今次寫錯嘢難免令人聯想胡錦濤係咪被人整蠱，莫非有人想借呢個所謂嘅錯誤，為胡佳製造聲浪、曲線救胡佳？話唔定可能有人想胡主席代入胡佳嘅角色，諗吓胡佳嘅情況都未定喎！