中環耳目：Ann蔣康樂園飲茶孝敬雙親

蔣震博士七個仔女出名事侍親至孝，不僅大多數婚後都繼續住喺康樂園，逢星期日仲會同父親一齊飲茶食飯。阿Ann話佢哋多數喺康樂園私人會所康樂樓開餐，貪佢就腳，唔使父親左騰右騰。阿Ann又話，飲茶食嘢度度都差唔多，最緊要係陪吓老人家；如果夜晚冇活動，一家人都會繼續食埋晚飯，夠晒熱鬧。蔣震嘅仔女開枝散葉後，依家孫仔孫女有成二十人，可謂兒孫滿堂。如果齊人嘅話，一家人食餐飯夠擺三圍㗎。

蔣震當日嘅胃口唔錯，叫咗至愛嘅筍尖鮮蝦餃同翠玉鮮蝦腸粉。形影不離嘅蔣太服侍在側，囝囝蔣志堅都喺度，加埋唔願上鏡嘅其他家人，一家人樂融融羨煞旁人！

康樂樓嘅筍尖鮮蝦餃同翠玉鮮蝦腸粉，係蔣老先生嘅至愛。

康樂園私人會所康樂樓夠私隱又就腳，難怪成為蔣家聚腳地。