中環出更：朱玲玲行LV搜刮新貨
「永遠最美麗港姐」朱玲玲，扮靚一向有心得，着衫最愛Blanc de Chine「源」，講到手袋，就同城中名媛一樣，熱捧LV。尋日晏晝三點幾，朱玲玲手執價值＄14,200嘅LV Monogram Multicolore系列手袋，穿上最潮嘅黑色魚嘴高跟鞋，同友人行入中環置地廣場嘅LV專門店搜刮新貨。
咁啱得咁蹺，卓妮行經LV，見到朱玲玲從Benz座駕步出，車牌係「HK 77」。佢落車後與友人飛快步入LV，專攻新款手袋及新鞋，可惜呢轉冇乜心水，睇咗五分鐘就走人。
搵「拍友」睇相
買唔成新袋，佢轉身走上置地三樓一間珠寶店，足足逗留二粒半鐘，唔通係掃巨鑽？非也！男職員Dickson爆料話，同朱玲玲係「拍友」，佢此行係為睇相而來，唔係買珠寶，事關朱玲玲舊年去中國拍咗唔少東北虎靚相，專程攞畀老友分享吓。醉心攝影嘅朱玲玲順便問Dickson借相機。離開珠寶店時，手上多咗一個環保袋。
卓妮趁機上前追問大仔霍啟剛同「跳水公主」郭晶晶幾時拉埋天窗，朱玲玲甜笑話：「未有咁快！」佢話，不時與三位公子見面食飯，阿囝嘅新近況，佢當然最清楚。