中環出更：建制派贊成杯葛《城市論壇》
「秘密飯局」已逐漸成為建制派嘅論政平台。繼去年底全國政協常委楊孫西喺清水灣道大宅搞秘密飯局，等中聯辦及建制派就對抗五區總辭共商對策後，尋日政改方案出台，建制派嘅「秘密飯局」就移師咗去中總會所，據聞中聯辦官員都有致電建制派議員，敦促佢哋務必出席，大家來個大團結。不過，大家可能覺得呢個冇改方案都無乜好傾，改為熱烈討論暫時杯葛出席港台《城市論壇》，大部分與會議員都好贊成添。
立法會一連兩日審議財政預算案，首日慣常開到好夜，但尋晚七點鐘，立法會主席以三十人發咗言為由提早散會。忽然提早散會，當然唔會因為已有一半人發言咁簡單啦，卓妮收到風，原來班建制派議員要趕往中總出席建制派飯局，卓妮到中總一趟，數一數，果然有廿六名建制派議員分兩邊坐喺一張長形餐枱，好有氣勢。
除咗身為地膽嘅中總代表黃宜弘外，仲有民建聯議員、自由黨主席劉健儀、經濟動力嘅林健鋒、梁劉柔芬、梁君彥及劉皇發，以及工聯會黃國健及王國興，同埋「五散人」嘅譚偉豪、梁家騮、陳健波及陳茂波，「金勞詹」詹培忠及謝偉俊都去咗。發叔唔舒服有幾聲咳，提早離開都去一趟。
劉健儀有異議
據聞飯局原意係談論政改，但大家覺得大部分建制派都支持方案，無乜好傾喇，金勞詹就提出近期港台《城市論壇》場面失控問題，提議與其送上門受靶，倒不如暫時唔上論壇，變相杯葛。議題一出，群情洶湧，大家七嘴八舌，有上過論壇嘅「苦主」猛呻，話以前去論壇好溫和，能夠暢所欲言，但依家上親去都無得講，仲要被人圍攻。
據聞自由黨主席劉健儀有異議，話如果航運界有事，佢都會去，點知有人出聲：「既然唔去，大家就一齊唔去啦。」有與會者話，班議員有共識，就係杯葛行動唔作綑綁，各自決定。
其實喺呢個飯局之前，好幾位議員都同卓妮講，計劃杯葛論壇。「象哥」黃定光話：「君子不立危牆之下」，不去為妙；黃宜弘話出席論壇等於墮入人哋陷阱，去到盞畀人鬧；陳健波亦話，城市論壇已失控，費事上到去被人鬧完無仇報。發叔就笑笑口話，唔敢上論壇，但唔係怕咗「維園阿哥」，只係費事上去吹風啫，認真幽默！至於「怪醫」梁家騮同王國興則話照上論壇無有怕，睇吓佢哋幾時上去。卓妮