政情：國泰空姐暫時鳴金收兵

國泰空姐本來今日醞釀工業行動，就喺行動爆發前夕，國泰資方願意作出讓步，而工會尋日召開長達近五小時嘅會員大會後，亦決定放棄工業行動，暫時鳴金收兵。不過，國泰空中服務員工會主席黎玉嬋就表明，工會未算打勝仗，如果資方喺四月尾前唔重開談判，傾埋餘下嘅外籍員工飛本地員工航線問題，唔排除會喺五一勞動節發起遊行；佢相信國泰係大公司，唔會秋後算帳。咁即係話，工會同資方只係暫時偃旗息鼓，戰火隨時死灰復燃。