政情：盧瑞安長假照出巡

上周五首日長假期早上七點幾鐘，我哋就喺太子維景酒店門外遇到港區全國人大代表盧瑞安，酒店鄰近中港直通巴士站頭，莫非佢又係搭直通巴士到內地玩？但見佢着住西裝咁斯文又唔多似去玩喎，細問之下，原來身為中旅社董事長嘅佢，係到太子分社巡視業務，睇吓長假期嘅運作順唔順暢。

盧瑞安話，長假期首日會有好多旅客到內地，做董事長點都唔可以假手於人，要親身到場巡視吓直通巴士嘅賣票情況，查看運作係咪暢順，並為假期開工嘅同事打打氣同鼓勵一下。

盧瑞安七十年代加入中旅社至今，做事向來一絲不苟，凡事親力親為，經常親自到內地踩線籌組旅行團，好似兩年前青藏鐵路通車後，佢曾先後兩次遠赴西藏踩線，所以晨早到站頭巡視，算係小兒科嘞！