政情：卿姐有新水喉射住

難得搵到新水喉，卿姐話要同議員辦事處班同事好好商量吓點樣用筆經費，例如請多啲人去培育政治人才喎。

捐錢嘅嘢多多益善、少少無拘。翻查卿姐今屆向立法會提交嘅申報發現，佢不時收到熱心人士捐款，但加埋只得千幾蚊。除咗直接捐畀卿姐外，○七年佢仲喺前綫嗰陣，同民主黨主席何俊仁組織中國維權律師關注組，當時獲得何東後人何鴻卿爵士捐贈三年經費，每年一百二十萬元，不過呢筆經費就唔係直接捐畀卿姐。

久旱逢甘露嘅卿姐喜獲五十萬元捐款，資助佢「推動香港民主嘅研究和工作」。咁鍾永珏係何許人呢？舊年中文大學頒咗榮譽院士畀一個同名同姓嘅鍾永珏先生，此人喺一間美資貿易公司做到營運總監，九七年退休後，致力並資助創業投資公司喺香港創業，又研發新科技，依家係田長霖博士科技創新基金會董事。

不過卿姐話唔肯定呢個係咪捐錢畀佢嘅鍾永珏，又話唔想講人哋嘅嘢喎，佢只係肯透露大家識咗幾年但見面又唔算多，咁都肯慷慨解囊，總之真係好好人喎。