政情：哪吒撲飛拉隊睇Eason
歌神陳奕迅（Eason）開騷，粉絲連日來逼爆紅館，據聞部分靚飛更炒高至千九蚊一張，當年扮演過哪吒嘅自由黨區議員方國珊都加入撲飛一族，前晚掏荷包請埋自由黨主席劉健儀（Miriam）、契爺胡楓及胡楓孫仔，齊坐V.I.P.位睇騷。
哪吒迷上Eason多年，買齊對方唱碟不在話下，每次Eason開演唱會必定飛身捧場，哪吒對偶像金曲琅琅上口，最鍾意係嗰首《明年今日》喎。今次Eason個唱反應熱烈，靚飛難求，哪吒個幾月前已四出撲飛，結果買到四張。
開騷前，哪吒約埋契爺同Miriam喺門口集合，為免泊車搵位難，Miriam改搭火車，可惜因為唔熟紅館地形，集合時間到仍未見佢出現。哪吒急如熱鍋上的螞蟻，拿拿臨派助手去紅磡火車站接Miriam，好彩最後趕及入場睇演唱會。