政情：劉江華做無殼蝸牛
樓價持續飆升，行政會議成員當中，買樓保值蔚然成風，「新界王」劉皇發同「金刀梁」梁智鴻係最佳例子，不過，選擇行另一條路、喺高價賣樓套現嘅，一樣大有人在。繼保安局局長李少光向行會申報已出售元朗一個住宅物業之後，民建聯副主席劉江華最近亦賣咗樓，變番做無殼蝸牛租屋住。劉江華話，賣樓同市況無直接關係，全因舊居前面將會起樓，本來一窗無敵海景，勢被遮擋，於是寧願換屋都要換番個海景返嚟。
香港「八十後」嘆買樓上車難，怨氣谷爆，搞到要喺下個月發動遊行示威，而劉江華就有業主都唔做，陪大家做番無殼蝸牛。行會成員嘅利益申報冊顯示，劉江華同身為廉署高官嘅劉太本來共同擁有沙田區一個住宅物業同一個停車位，全部自用，但由上月十二日開始，呢項紀錄被刪去，即係劉江華近期賣樓套現。
成交價五百五十八萬元
劉江華啱啱拋售嘅物業，係十六年樓齡嘅一個馬鞍山私人屋苑高層單位，根據某地產網嘅資料，層樓一千零六十八呎，舊年十二月交易，成交價五百五十八萬元，平均呎價五千二百二十五蚊，與同屋苑嘅其他相類單位呎價相若。
近期樓價升咗唔少，賣樓通常有賺，我哋問劉江華，呢單交易有無執番多少？佢以私隱為由，表示唔方便回應，但強調，樓價高低唔係今次賣樓嘅主要考慮因素。佢解釋，舊居面向吐露港，令佢情有獨鍾，可惜，間屋對面嘅地皮，最近有發展商補地價，要喺上面起豪宅，啱啱擋住舊居景觀。佢為咗可以繼續天天望海，索性賣咗層樓，喺同區租番間有海景嘅樓住住先。至於會唔會再做業主，佢話：「搵到好嘅至算。」
親中陣營唔少人都知道，劉江華一向重視健康，對飲食營養相當講究吓，原來佢對住屋都咁有要求，為咗睇海景，寧願換樓，真係估佢唔到！