中環出更：楊振寧偕妻食晏晒恩愛
點樣先為之係匹配嘅婚姻呢？當年諾貝爾物理學獎得主楊振寧同翁帆相距半個世紀年齡嘅婚姻一度惹起爭議。事隔五年，人前人後都咁恩愛嘅楊氏伉儷，用一致嘅笑容同眼神，證明年齡差距無礙幸福婚姻，羨煞不少追求真愛嘅男女。
精神胃口俱佳
早前楊振寧孖住老婆翁帆喺置地嘅Cafe Landmark食lunch，今年踏入「雙八」年華嘅楊生精神同胃口一樣咁好，連甜品都食得晒。好talk得嘅楊生，仲搞到楊太掛住聽佢講，連朱古力蛋糕，都只係淺嘗輒止。食飽飽，楊太自動波打開手袋攞銀包埋單，然後指一指杯清水，楊生就「好聽話」咁飲番啖然後先起身走。
記得幾年前，楊振寧細佬楊振漢話哥哥自從識咗翁帆之後，成個人開心晒，仲大讚阿嫂好細心。當日卓妮所見，除咗細心，楊太仲跟實老公嘅步伐，即使楊生喺餐廳出嚟帶錯路，楊太只係同老公相視而笑，一啲投訴都無。楊太話今次因為有啲事要搞，所以兩公婆先過嚟香港住幾日，楊太仲話老公同「光纖之父」高錕都係中大人，大家好稔熟，所以之前見過面敍舊添。
卓妮