中環出更：慈母一句話施子清勤練字
全國政協委員施子清，係政圈中寫得一手好字嘅書法家，六十多年來堅持每天練字。看似執着，其實係一份對怡情養生嘅追求。施子清話，書法令佢渾然忘我，即使美女當前，也不為所動！
卓妮早前登堂入室，走進施子清嘅書房，墨香氤氳。文房四寶齊備，僅毛筆就有二、三十支，收藏嘅圖章，順手拈來也有廿幾個。不過原來佢豪宅大裝修，呢個只係佢喺公司嘅臨時書房，好多可以造圖章嘅珍貴原石，有啲價值達六位數字，但收藏喺屋企。
學問需有靚字陪襯
施子清走進書法大門，原來多得母親啟發。佢九歲喪父，與媽媽及年僅五個月大嘅妹妹相依為命。雖然家貧，但母親常教子女讀書識字，訓話更發人心省：「一個人縱有學問，寫出來嘅字唔漂亮，就不匹配。」自此，施子清每天勤練字，家中沒有多餘錢買紙，母親就叫佢用水到天台嘅地磚上練寫。
上小學時有書法班，施子清認識到名家嘅書法世界變化多端，愈寫愈興奮，一練就六十餘年，至今從未間斷。無論工作有多忙，每天堅持抽出兩小時練字。
停不了，有原因。不是為寫而寫，而是書法以外，有筆墨難以形容嘅超然境界。開筆寫字前，施子清會關掉手機，坐喺書房嘅大班椅前閉目養神，心無雜念，才悠然地提起毛筆，一氣呵成。寫一排合共有三十六幅嘅《心經》，佢用三粒鐘時間速成。游走書法多年，施子清慨嘆，走進書法嘅門檻很容易，但形成個人風格卻很難。
今天，佢苦練有成，早已自成一家。多年來，先後出版過多本書法著作，包括《子清墨趣》、《子清墨韻》，其個人書法展亦曾先後喺本港、台灣、北京及家鄉福建等地展出。曾有拍賣行敲門想拍賣佢嘅字，畀佢一一拒絕，反而主動將墨寶送贈知音人，全國人大常委范徐麗泰就係其中一個，范太將字畫掛喺當年立法會主席辦公室隔鄰嘅會客室，公諸同好。
施子清同書法結下不解之緣，可惜四位公子未有遺傳書法細胞，不好寫字。唯獨太太係佢嘅「頭號粉絲」，雖然不諳書法，卻默默地守在身旁，為老公磨墨、鋪紙。夫妻情深，默契盡在不言中！
卓妮