政情：潘宗光避談「九宗罪」
香港理工大學有教職員早前發公開信，力數校方管理層喺過去十年賤賣理大資產及涉及利益衝突等「九宗罪」，矛頭直指上任理大校長潘宗光在任期間嘅領導班子，理大現任校長唐偉章最後宣布成立獨立小組檢討學校各附屬公司嘅理財狀況。
日前喺一個晚宴見到潘宗光，問佢點樣回應「九宗罪」嘅指控，佢笑笑口話：「有關問題要留畀理大新領導班子回應，我唔適合答呢啲問題。」對於有指控涉及佢在任時嘅事情，問理大有冇邀請佢提供資料，潘宗光都係重複同一個答案，話「清者自清」。
潘宗光○八年底退休後好低調，依家係上市公司嘉華國際、理文造紙及合和公路基建三間上市公司嘅非執行董事。根據港交所嘅股東權益披露，迄今年三月廿四日為止，潘宗光先後分四次減持理文造紙股票，價位喺六蚊左右，套現逾六百萬元。不過，對於「九宗罪」嘅指控，唐偉章早前承諾喺三個月內向校董會提交報告，所以潘宗光封嘴都好正常。