日前喺一個晚宴見到潘宗光,問佢點樣回應「九宗罪」嘅指控,佢笑笑口話:「有關問題要留畀理大新領導班子回應,我唔適合答呢啲問題。」對於有指控涉及佢在任時嘅事情,問理大有冇邀請佢提供資料,潘宗光都係重複同一個答案,話「清者自清」。
潘宗光○八年底退休後好低調,依家係上市公司嘉華國際、理文造紙及合和公路基建三間上市公司嘅非執行董事。根據港交所嘅股東權益披露,迄今年三月廿四日為止,潘宗光先後分四次減持理文造紙股票,價位喺六蚊左右,套現逾六百萬元。不過,對於「九宗罪」嘅指控,唐偉章早前承諾喺三個月內向校董會提交報告,所以潘宗光封嘴都好正常。