政情：青委會補鑊吸納80後
高鐵爭議及青年高峰會議嘅混亂場面，令人質疑青年事務委員會只得一成「八十後」青年委員，聽唔到青年人嘅聲音。政府急補鑊，尋日委任十名新成員，當中新加入幾名八十後委員，其餘為七十後及六十後，五十後幾乎絕迹。不過，委員會主席陳振彬（Bunny）反駁話：「立法會都無八十後議員啦，莫非就唔可以決定八十後青年政策？」
青年事務委員會十名新成員，雖然來自唔同背景，好似七十年代尾出生嘅鄭家豪為南拳高手，獲獎無數，亦曾擔任奧運火炬手。同樣七十年代出生嘅呂宇俊喺九一年首次會考得零分，之後發憤苦讀成才，○六年獲選為十大傑出青年。至於「八十後」嘅蘇柏軒為香港管弦樂團嘅出色助理指揮家，另外兩個「八十後」則為北區區議員劉國勳及大學生吳雅媛。
Bunny話，包括八十後在內嘅最後生青年委員，會專責參與委員會轄下國際交流及會議小組工作，務求達至與年輕人溝通目的。至於青年研究及發展政策工作小組、活動推廣工作小組，則需要較年長學者、教授及有商界財務經驗嘅人擔任。另外，政府亦為公民教育委員會加入九名新成員，部分為政團及香港青年聯會成員。