政情：葉劉硅谷考察玩餐飽
匯賢智庫立法會議員葉劉淑儀上月尾帶團去美國硅谷考察，一行三十人連日來四出參觀硅谷嘅科技公司同研發中心，仲同當地業界會面交流。葉太前日就到著名嘅互聯網設備供應商美國思科系統（Cisco）參觀，考察之餘趁機玩餐飽。
扮醫生視像「巡房」
Cisco嘅正門放咗個巨型電話做擺設，葉太一見到就忍唔住撲埋去同個電話筒合照。Cisco開發咗一套網絡硬件，令醫生可以透過視像「巡房」，慳番唔少睇症時間，葉太亦即席扮起醫生，一嘗安坐房間「遙控」診症嘅滋味。
快樂嘅時光過得特別快，葉太一行人聽日就會起程返香港。葉太返到香港後，櫈仔都未坐暖又要喺本月九日率領一班大專生坐高鐵到武漢考察，一連三日嘅行程只需五百元，葉太當然要掏荷包津貼，所以一百二十個名額早喺兩個月前已經爆滿。