政情：劉健儀埋怨廿蚊張累死自由黨

葵青區樁腳退黨

Miriam尋日承認「廿蚊論」對自由黨造成好大打擊，日日都有政黨啄住抹黑自由黨，落區工作嘅黨友承受好大壓力，仲有區議員因此退黨。我哋八到退黨嘅係葵青區區議員譚惠珍，佢入黨時間唔算短，係自由黨嘅地區樁腳；譚惠珍同我哋呻，話當日聽到「廿蚊論」後好忟憎，諗極都唔明點解廿蚊張講得出口，之後佢日日落區畀人鬧無恥，將之前打落嘅根基一鋪清袋，無可奈何之下先退黨。

記得當日廿蚊張喺《城市論壇》發表「廿蚊論」後，喺現場已經畀人掟廿蚊紙，連業界都鬧埋一份，網民亦唔放過佢，翌日下午，Miriam急急拉埋另一副主席方剛開記招，與廿蚊張劃清界線，據聞事先亦無知會廿蚊張，後來廿蚊張出嚟道歉，都係佢自己唱獨腳戲，所以黨內都有微言，批評Miriam危機處理能力不足。不過Miriam尋日就力陳廿蚊張嘅不是，佢話廿蚊張喺《城市論壇》上亂講嘢，事前無通知佢，當晚佢已經要上電台解畫，可惜無乜人留意，所以翌日先至要開記招撲火。Miriam又話自由黨一直強調最低工資為時薪廿四蚊，廿蚊張冒險發表「偉論」，係有心為佢自己業界「試水溫」，言下之意批評佢自把自為唔理黨嘅立場。

Miriam仲揶揄廿蚊張無「說話的藝術」，話即使真心想喺市場試水溫，只要廿蚊張講一句最低工資應該訂喺廿蚊或以上、而唔係用「殺傷力」呢啲字眼，成件事即刻唔同晒。一句講晒，佢即係話「廿蚊論」搞到滿城風雨，都係廿蚊張一個人嘅錯。自由黨自分裂後已元氣大傷，廿蚊風波後更受重創，今次Miriam仲火上加油，真係唔知點收科！