中環出更：梁定宇掌東華無後顧之憂
擁有一百四十年歷史嘅東華三院尋日舉行新一屆董事局成員就職禮，李三元主席正式交棒畀新主席梁定宇（Billy）。Billy由總理到主席，喺東華足足服務咗九年，不過舊年做第一副主席就好似「潛咗水」咁，比較低調，Billy話係因為做主席要瞓身落去做，舊年要先將家族生意打點好，等今年做主席無後顧之憂。
做內地廢紙回收嘅福和集團前日上巿，集團主席梁契權正係Billy爸爸。Billy嚟緊要履行做主席嘅責任，今個復活節都無得去玩，要去東華義莊主持拜祭儀式。做得東華主席好多活動都要參與，雖然少咗私人時間，Billy都無話後悔，難得老婆Carol好支持，除咗每晚準備愛心湯水幫老公打氣外，仲幫老公打理生意，絕對係稱職賢內助。
李鋈麟斷韌帶照撐場
至於升呢做顧問嘅李三元亦力撐Billy無失蹤。佢話連埋醫院在內，東華每年營運涉及嘅款項高達四、五十億，做主席責任重大，Billy舊年先安頓家業係好應該。家有兩子嘅李三元話，囝囝都好有興趣做善事，咁幾時入埋東華呢？李三元笑言：「佢哋搵到錢，想幾時加入都會支持。」
身為北京市政協委員嘅東華總理李鋈麟早前踢波斷咗十字韌帶未好番，都一早到場參加就職，之後仲要趕住坐私人飛機去越南公幹，睇吓喺當地起酒店嘅進度，睇嚟佢嗰復活節要喺工作中度過。
卓妮