中環出更：孫大倫復活節長假豪遊中東
復活節長假期今日正式開始，好多政商界大忙人都出埠輕鬆吓，當中以富士攝影器材有限公司主席孫大倫最豪，去非洲及中東旅遊一個月，滙豐銀行亞洲私人銀行服務行政總裁王以智就選擇到土耳其睇古蹟，教育局局長孫明揚一家會到北京旅遊，鄉議局主席劉皇發則到惠州玩一兩日。至於青年事務委員會主席陳振彬就會帶兩個愛兒到新加坡環球片場大玩特玩。
孫大倫嘅復活節悠長假期分三部分旅程，首先坐豪華郵輪暢遊包括杜拜嘅阿聯酋七個小國，然後再過紅海到埃及文明古國，參觀首都開羅博物館嘅歷史文物珍藏外，仲會暢遊尼羅河及沿岸神殿古蹟。尾站再轉往鄰近嘅約旦，並會喺電影《聖戰奇兵》拍攝場地Petra（佩特拉）古城住宿，喺漆黑環境下欣賞黑夜星空。
孫明揚太太帶孫仔做好漢
埃及開羅博物館擺放好多出土文物，尤其係法老王圖坦卡門嘅金面具更享譽國際，遊客人頭湧湧，一日都未必睇得晒，據講博物館方面特別提早到清晨五時開門，畀孫大倫個豪華團率先進場慢慢觀賞，確實係非一般待遇。做開攝影器材生意嘅孫大倫話，今次會帶兩部相機去影靚相，回港後會將啲靚相製作成靚相簿好好珍藏。
孫明揚尋日返半晝工，下午隨即與太太鍾小芬、女兒及女婿、孫仔以及加拿大親戚等一行十二人，一齊啟程到北京玩五日。孫太話，希望帶個孫仔到長城做好漢，又會到故宮、鳥巢及水立方等景點參觀，當然仲會去王府井大街歎吓出名嘅燒羊肉火鍋啦！孫太仲諗埋後着，如果遇上沙塵暴，就會到王府井東安市場吃喝玩樂。
九巴董事雷禮權（William）就留港不出門，事關佢稍後會陪十七歲嘅愛兒到美國揀大學。William一對仔女喺英國讀書多年，卓妮問佢會否牽腸掛肚，佢話對仔女每年回港五次，而且佢每年都有十次機會飛到英國處理生意業務，所以經常同仔女見面，如在身邊。總之呢個復活節，大家各自各精彩！
卓妮