政情：盛智文扮皇帝戲宮女

話說扮嘢文尋日出席海洋公園高清動物月嘅揭幕禮，介紹為期一個月嘅蜥蜴展，佢着住件龍袍帶住兩位靚靚宮女現身，行出場嗰陣竟然真係有古裝嘅功架。席間，扮嘢文仲同兩個宮女玩起蜥蜴上嚟，十足十一個風流皇帝。

轉個頭，扮嘢文搖身一變，竟然化身古代維京戰士，佢騎喺條巨型惡龍上面扮晒要馴服隻猛獸，睇佢拎住武器同盾牌擺出有型姿勢，又不停擺動身體，好似條龍真係喺天上面飛緊咁，佢仲自爆細個嘅夢想就係坐住條龍做馴龍師。佢咁落力為咩呢？原來係介紹呢個展館裏面一部特技影相系統，唔怪得佢喺塊綠色嘅布景前面要出盡渾身解數啦。