自從立法會議員卿姐劉慧卿由前綫轉投白鴿黨，該黨原有班男議員好似志雲大師咁，生活起咗啲變化，包括開黨團會議嚴禁無故遲到，否則就要罰錢，又唔可以好似以前咁喺會上爆粗鬧人同講有味笑話，議會生活枯燥咗好多。不過班白鴿仔冇因而諗過放棄，反而成日飛甩卿姐，大搞「男士之夜」，重溫吓過去十幾年全男班開黨團、乜衰嘢都講得出口嘅光景。
通常最方便係立法會周三開大會，因為當晚佢哋一定唔會約人食晚飯，一旦大會無乜議程提早放學，李永達、張文光、涂謹申同甘乃威等幾隻鐵腳，就等埋一齊食飯消夜，將平日講到嘴邊都要收番嘅粗口同鹹濕嘢一次過噏番晒出嚟。咁邊個白鴿仔講得最多最專業？據聞講有味笑話講得最好笑最到肉嘅首推「肥仔明」李華明，爆粗爆得最流利同詞彙最廣嘅係「高達」李永達，鬥爛口未必輸畀辭咗職嘅社民連三子。