政情：發叔澄清冇摸貨圖利
元朗YOHO MIDTOWN熱賣當炒，吸引唔少投資者入市，身兼行會成員嘅鄉議局主席劉皇發，都斥資逾八千萬元大舉掃入廿四個單位，仲被傳買入單位無耐，就以摸貨（確認人身份）形式沽出兩個單位，帳面獲利逾一成。我哋查過，原來發叔及其家族成員有份嘅兩間公司、包括嘉忠投資有限公司，早前大手買入元朗YOHO MIDTOWN廿四伙，出手豪氣。行會成員買賣物業，尤其涉及炒賣，一向敏感。我哋翻查行會申報紀錄，發叔最近一次利益申報係喺上年七月，即係呢廿四伙交易無顯示到出嚟，難怪惹來疑竇。
我哋尋日問發叔，佢承認自己確實係兩間公司嘅董事，但今次買入MIDTOWN單位，全部係大仔劉業強搞，佢事前唔知情，事件曝光後，佢審過兒子，個仔實牙實齒話無摸售MIDTOWN單位，發叔話：「斷估個仔唔會呃我嘅！」佢解釋，兩個月前公司售出灣仔會展一層寫字樓，多咗閒錢喺手，加上銀行利息又低，於是物色單位作長期投資，先至買咗MIDTOWN，但無諗住短炒，更加無摸貨，會考慮出租或作自住用途。
話未做契未使申報
至於無向行會申報，發叔話，今次買賣未做契，未使向行會申報，但政府講緊壓抑樓價，自己身為行會成員，又點會炒樓？咁又係，佢老人家坐得行會個位，行事當然要審慎，以免惹人閒話。記得現任平機會主席林煥光早前講過，人權位愈高，誘惑愈大，所以要時刻警醒，切勿踩過界！