政情：玻璃滿地唐唐CY碰杯唔老利

為慶祝《基本法》頒布二十周年，一國兩制研究中心尋晚搞咗個晚宴，筵開十幾席，邀請城中百幾位名人出席。身為研究中心理事會主席嘅行政會議召集人CY當然有出席，署理行政長官唐英年都有份主禮。出席晚宴嘅仲有中聯辦主任彭清華同一國兩制研究中心執委會主席兼恒隆主席陳啟宗等。

期間唐唐同CY喺台上不時咬耳仔，有時仲相視而笑，兩個都係四萬咁嘅口，睇唔出有半點芥蒂。點知十幾位主禮嘉賓齊齊上台祝酒嘅時候，準備由左邊上台嘅禮儀小姐，一個唔小心整跌咗托盤上嘅香檳，搞到遍地玻璃碎，工作人員連忙執番好啲嘢同換過批新嘅，台上眾人就繼續儀式當無嘢，不過發生咁嘅事就認真大煞風景。