政情：煲呔曾獎賞李大壯？

李大壯喺香港政壇本來名不經傳，但經歷自由黨○八年分裂一役，始為人注意。本身係新大中集團執行主席嘅李大壯，係張學良後人，長期游走於兩岸三地，搵佢幫手做台港工作，係情理之內，但睇番港台商貿合作委員會嘅組成，十五名成員中好多都有麟有角，喺政商界比佢更具聲名或更有家族背景嘅大有人在，好似太古（中國）的陳南祿、前港交所行政總裁周文耀、東方海外嘅董建成、廠商會會長黃友嘉、針織大王方鏗女兒方淑君同李錦記二代李惠中咁，秤起嚟未必低過李大壯喎，究竟佢有乜把炮坐到主席呢個位呢？

消息指中港台能接受人物

近年兩岸吹暖風，台港工作大有作為，煲呔曾委任鬍鬚曾執掌協進會，擺明益自己友，畀鬍鬚曾有個舞台表演，但為何醒埋畀李大壯呢？李大壯尋日喺記者會上照稿讀，講一輪好榮幸獲委任一類「行貨」就離開。其後喺個酒會上佢話，三日前政府至通知佢獲委任，無講原因；佢話自己的確同台灣好有淵源，老婆都係台灣人，可謂台灣女婿。

消息就話，李大壯坐到主席呢個位，係因為佢係中央政府、台灣同特區政府三方面能夠接受嘅人物。呢句說話最可圈可點嘅，係「特區政府」四個字。乜有啲人係兩岸都接受、但特區政府唔接受嘅咩？定還是應該倒番轉嚟講，係煲呔曾特別鍾意李大壯呢？

記得○八年自由黨立法會選舉大敗，被煲呔曾視為政壇天敵嘅田北俊辭去主席職務，黨員聯署挽留田少，喺呢個關鍵時刻，李大壯秘密晤黨內一眾區議員，游說大家放棄聯署，仲提出自由黨日後應改弦易轍，放棄直選戰場，事件引起黨內嘩然，牽引出自由黨路線之爭同主席位置角力等風波，最終導致林健鋒、梁君彥同梁劉柔芬退出自由黨，自由黨分裂，元氣大傷。講起上嚟，煲呔曾真係要多謝李大壯！依家台港工作正係用人之際，不在此時，尚待何時？