中環耳目：陳振彬上潮州會館解鄉愁

所謂思鄉情愁，身為潮州人嘅青年事務委員會主席陳振彬（Bunny），久唔久會心思思想食家鄉潮州菜，呢日Bunny專登貢去上環嘅「潮州會館」，大歎家鄉蒸蟹。

潮州凍蟹一向出色，原來蒸蟹也不遑多讓，Bunny柯打時令肉蟹，煮法原汁原味，清蒸上碟，已是蟹香四溢，蟹身足足有兩隻手掌咁大，但肉質唔老，反而又嫩又甜。

Bunny話潮州人愛食海鮮同靠近海邊有關，食魚平過食飯，所以潮州人會將烚魚當飯食，呢日Bunny點咗一味魚飯，拌以普寧豆醬，鮮味提升百倍。大家咪畀魚飯個名呃咗，廚師將魚拆肉上碟，啖啖肉。潮州人烚魚有妙方，嗰煲水好少更換，完全吸收晒魚肉精華，經過呢煲千年魚湯煮一煮，神仙都企唔穩。

食潮州菜唔少得滷水食品，食厭咗滷水拼盤的話，Bunny推介一味「酥炸滷水乳鴿」，賣點係先將乳鴿用陳年滷水汁醃到入晒味，之後再用油炸，令乳鴿皮脆肉香，分外惹味。