中環出更（二）：莊家蕙示範戴翡翠鏈靚絕

新一代社交名媛好少追求顯得成熟嘅翡翠，但莊士集團太子女莊家蕙（Candy）做咗富得拍賣行主席兩年之後，品味都受到少少影響，事關富得專做中國古董玉器等藝術品拍賣，Candy耳濡目染下都對呢啲古物有少少心動，早前佢仲親自演繹一條估值高達二百五十萬元嘅翡翠珠鏈。當古老翡翠遇上潮女，一樣係咁省鏡！

Candy老竇莊紹綏近年逐漸將部分棒子交畀囡囡，前年Candy接咗老竇佔大股嘅富得拍賣行主席個位，靚女接棒即刻令富得嘅形象年輕晒！舊年老竇畀佢做莊士中國首席營運總裁，負責睇埋內地嘅地產等投資，Candy嘅表現都唔輸畀阿哥莊家彬。

富得將於下個月初舉行成立十周年慶典拍賣會，屆時會有七百多件中國瓷器、珠寶、腕錶等稀世珍寶待價而沽。Candy話佢對每件寶物都心動，不過女仔始終鍾意可扮靚又有收藏價值嘅飾物，佢仲現場演繹一條待拍嘅翡翠珠鏈，襯上佢閃爆嘅私伙耳環，即時靚絕全場。

雖然佢入行兩年，未有鑑定古董寶物嘅本事，但Candy話公司有好多重量級專家坐鎮，佢哋另一名股東，正係三月初喺北京中風留醫嘅全國政協常委徐展堂。

卓妮