中環出更（一）：大舊石轉戰米蘭訂造Zegna老西

立法會議員石禮謙性格好專一，對女友Lisa一往情深，着衫亦然，十幾年來只鍾情意大利Ermenegildo Zegna西裝。大舊石欣賞呢個品牌質料上乘且手工精細，佢身上新簇簇嘅西裝，竟然購自十五年前，售價五千元，認真物有所值！不過，大舊石最近喺香港買西裝好懊惱，本周二（三十日）專登飛意大利米蘭Ermenegildo Zegna旗艦店度身訂造。
石禮謙（右）同葉宏德都對 Zegna嘅西裝情有獨鍾，前日仲孖住飛米蘭訂造新衫。（葉華英攝）
石禮謙（右）同葉宏德都對 Zegna嘅西裝情有獨鍾，前日仲孖住飛米蘭訂造新衫。（葉華英攝）

避免與內地客競爭

其實香港亦有Ermenegildo Zegna專門店，點解要親身去米蘭呢？都係多得祖國繁榮昌盛，同胞蜂擁來港購物。早排卓妮喺尖沙咀新蒲點iSQUARE撞到大舊石同佢老友葉宏德，大舊石同卓妮呻話：「幫襯咗Ermenegildo Zegna十幾年，以前經常叫店舖如果減價就通知聲，但有次成個月都唔見有聲氣，於是打去問舖頭啦，點知舖頭職員話唔減價喇，事關好多內地客來港幫襯喎！」

大舊石仲記得有個朋友去Ermenegildo Zegna買衫，試完一件衫後，覺得個袋有啲瑕疵，要求試過另一件，試完第二件後又想要番原先嗰件，點知已經畀一位內地客搶先一步買咗！大舊石於是把心一橫，決定轉戰米蘭，香港一套西裝約二萬元，但米蘭嗰邊價錢就平一半，每套訂造西裝內袋會繡上「SU MISURA」字樣，即「度身訂造」，氣派不凡，訂完之後佢哋就寄返香港。

米蘭雲集國際時裝品牌，係掃貨好地點，連石禮謙都老遠飛過去訂造西裝。 （資料圖片）
  • 米蘭雲集國際時裝品牌，係掃貨好地點，連石禮謙都老遠飛過去訂造西裝。 （資料圖片）
Zegna以上乘質料聞名於世，訂造西裝內袋會繡上「SU MISURA」字樣。
  • Zegna以上乘質料聞名於世，訂造西裝內袋會繡上「SU MISURA」字樣。
新昌營造副主席王英偉（右一）愛打Zegna領呔，早前拉隊去掃貨。 （資料圖片）
  • 新昌營造副主席王英偉（右一）愛打Zegna領呔，早前拉隊去掃貨。 （資料圖片）

Ermenegildo Zegna手工出晒名好，但大舊石貪玩，攞一件Ermenegildo Zegna西裝邀請內地裁縫師傅拆散晒去複製，做咗八套，但無一套似樣，好彩每套只係七百元。

大舊石今次去米蘭有好朋友葉宏德律師同行，兩人都係Zegna迷，分外啱傾！大舊石與葉宏德稱得上深交，葉當年曾經介紹陳振聰予前立法局議員梁錦濠認識，而梁則推薦陳振聰予已故華懋集團主席龔如心。葉宏德話，佢印象中嘅陳振聰好聰明，雖然英文唔叻，但中文好好，以前對每樣事物都好有靈感，但後期大家接觸已經少咗好多囉。

卓妮