政情：林鄭不屑擦鞋減壓
煲呔曾早前上電台講到明鍾意「擦鞋」減壓，畀網民寸爆。點知發展局「好打得」局長林鄭月娥尋日出席電台節目時忍唔住寸埋佢一份。連下屬都睇唔過眼，煲呔曾真係要好好檢討吓嘞！
娥姐尋日畀主持問到佢最近一手推動嘅強拍條例同保育永利街問題，都令佢成為眾矢之的，問佢有咩方法減壓？有無學煲呔曾咁擦吓鞋？娥姐聽到後輕聲笑咗笑，然後好利落咁話：「我就唔識擦鞋！」又話自己嘅鞋「好多都唔使擦」。簡單兩句話，言簡意賅，但就充滿不屑，寸爆煲呔曾！可惜係娥姐無同大家分享自己嘅減壓心得，淨係話做得官預咗畀人鬧喎。
講開娥姐，尋日「民主阿婆」陳方安生同傳媒講話，都讚到娥姐天上有、地下無，話佢「有魄力、有幹勁、唔怕事、敢做、夠積極、講嘢有理據、唔帶人遊花園」，仲話呢幾項都係一個政務司司長應有嘅條件。民主阿婆一向被中央視為不友善嘅人，唔知佢嘅讚美會唔會成為娥姐「死亡之吻」、影響將來升官之路呢？