政情：譚耀宗寸爆周一鑊

香港活雞畀食物及衞生局局長周一嶽搞到不得安寧，○八年實施街市日日清之前，政府仲不斷話最快今年會起中央屠宰場，不過呢個講咗無十年都有八年嘅計劃，周一鑊尋日去立法會財委會回應議員預算案質詢時又話，會等埋份顧問報告先決定起唔起喎，不嬲擔心中央屠宰場做唔住嘅民建聯主席譚耀宗聽到周一鑊咁講，就忍唔住窒佢，話好彩政府議而不決，否則依家無得返轉頭：「大家都驚屠宰場最後變成大白象，好彩你（周一鑊）一直議而不決咋！」

譚耀宗聯同漁農界嘅黃容根與飲食界嘅張宇人，不嬲都唔支持中央屠宰場，喺呢個議題建制派都一直充當反對派，譚耀宗尋日繼續反對，話起到都驚個場做唔住，公帑到時又要補貼，依家有轉機，話要等埋份顧問報告先決定，譚耀宗都忍唔住寸爆周一鑊。全場捧腹大笑嘅同時，周一鑊貫徹唔認衰作風，否認議而不決，仲話知道活雞依家三十蚊一斤左右，想證明畀人睇自己好熟雞價。