政情：西九CEO唔識粵劇
拖咗兩年都未搵到人做嘅西九文化區管理局行政總裁一職，尋日終於塵埃落定，政府宣布由歐洲最大多元藝術場地巴比肯中心嘅藝術總監謝卓飛（Graham Sheffield）擔任，八月中履新，任期三年。尋日謝卓飛第一次出嚟見傳媒，學鋼琴出身嘅佢，話自己音樂、戲劇、舞蹈、電影、視覺藝術樣樣精，不過對於中國源遠流長嘅粵劇，謝卓飛就直認唔識，睇嚟佢順利過埋香港藝團嗰關，都未必咁順風順水。
謝卓飛由九五年開始管理巴比肯中心，行政經驗豐富，佢話廿幾年前已經嚟過香港，感受過本地文化藝術，近年都嚟過香港出席文化活動，雖然唔識粵劇，不過佢會保持同唔同藝團溝通，相信成個西九文化區入面咁多人手，可以大家互補不足喎！
雖然謝卓飛好努力咁說服大家佢有能力管好西九，不過政府似乎唔係好撐佢，皆因宣布任命佢嘅西九文化區管理局主席兼政務司司長唐英年，冇等謝卓飛見埋記者就雞咁腳走咗，唔知謝卓飛見到咁嘅場面有無少少後悔呢？