政情：郭炳湘：政改如大船 轉彎勿急
政改討論日益熾熱，工商界嘅立場，都係社會焦點。新鴻基地產非執行董事兼全國政協常委郭炳湘尋日開腔話，政制發展應該循序漸進，仲用「一隻大船唔可以突然間一百八十度轉彎」來形容政改唔可以操之過急，不過佢相信香港最終有全民直選。
論下屆特首條件
至於功能組別嘅存廢問題，郭炳湘認為香港咁多年嚟都係以經濟發展為主導，功能組別可以畀工商界參與政治，所以有其存在嘅歷史意義。不過咁，佢話新加坡全部議席都係直選產生，但工商界又未至於無機會參與，所以政改都係要摸着石頭過河，言下之意即係要向前發展。
至於下一屆特首人選嘅條件，郭炳湘認為咩背景人士都無所謂，至緊要有能力、全心全意為香港，同埋要令中央放心及易於溝通。
同為全國政協常委嘅徐展堂喺北京兩會期間中風入院，約近三星期過去了，至今仍未甦醒。郭炳湘話，徐展堂嘅手術好成功，已經脫離危險期，但仲未醒番，徐嘅家人搵咗一組最好嘅醫生照料佢。兩會期間郭炳湘去過醫院深切治療部探徐展堂，但醫生怕病人感染唔畀入，所以始終無見到徐。