政情：公社做騷貌合神離
自從公文袋、社民連五名立法會議員主動辭職、發起變相「公投」活動後，公社兩黨都好似冇乜出嚟一齊做宣傳，連係咪派「影子隊」參選、自動當選當唔當「公投」勝利等等嘅言論，兩黨都係各說各話，唔留意可能唔覺佢哋合作搞緊同一個活動。尋日五個辭咗職議員終於走埋一齊喺尖沙咀派《公投報》，不過今次不但無拉近到兩黨距離，仲更加凸顯佢哋嘅貌合神離，如果再係咁搞落去，分分鐘唔使人杯葛施壓，「公投」都要鳴金收兵。
辭職後一直都冇蒲頭嘅社民連三子尋日終於現身，不過黃毓民同陳偉業（大舊）就遲到早退，出席咗唔夠二十分鐘就閃人，其中大舊更加一到埗就企埋一邊玩電話，最後要長毛梁國雄開到聲叫佢，先肯拎疊《公投報》象徵式派吓，敷衍程度係社民連三子之冠！
投白票與否起爭議
其實淨係睇佢哋派報紙，大家都唔覺得兩黨有幾唔對嘴；不過佢哋一出聲，不和嘅迹象就即刻出晒嚟！首先講到投票率，雖然兩黨都叫市民出嚟投票，不過大舊就話，市民即使唔認同「公投」，出嚟投白票都總好過唔投，以免拖低投票率。不過大舊呢頭講完，嗰頭公文袋嘅梁家傑就即刻話唔贊同。袋巾傑叫市民千祈唔好投白票，因為白票呢件事存在好大嘅演繹空間，如果好多人都投白票嘅話，「公投」分分鐘站唔住腳。連咁簡單嘅立場都講唔掂數，真係想話佢哋無內訌都冇人信啦！
除咗白票問題，令兩黨有爭議嘅仲有「解放」口號。兩黨公布辭職當日，大舊高叫一句「解放香港」，搞到建制派全面封殺「公投」，殺兩黨一個措手不及。事後「五區公投」聯委會召集人余若薇頻頻話唔係要搞咩「解放」先丟淡件事，不過大舊似乎冇乜在意人哋嘅心意，尋日照舊叫「尋求解放、解放香港」嘅口號，公文袋幾個人惟有當聽唔到，繼續叫「沒有民主，哪有民生」，總之係你有你叫，我有我叫。兩黨分歧日益白熱化，睇嚟好戲還在後頭！